【盤房來料】大市高開殺重熊後而作整固

2024年5月3日

美國聯儲局議息後，市場對加息疑慮消除，美股隔晚顯著造好，重磅科技股領漲，納指反彈1.51%，道指回升逾300點或0.85%，標指升45點或0.9%。金龍指數急升6%，港股ADR延續升勢再漲逾200點至18500水平；夜期亦高收18520，黑期今早則升抵18600關，加上人民幣走強，兌美元升穿7.2大關，預期恒指今日高開，不過八連升加上嚴重超買後，今日預咗佢高開低走，只係強勢維持，今日理應唔會倒跌收場。

恒指開336點，報18543點後升幅再擴大至397點，高見18604半日高位，見自去年9月以嚟新高，但連升第九個交易日，加上周末前夕，市場再高追意欲有限，升勢亦回順，半日升幅幾近削半。至於恒科指則一度重越4000關，高見4023，但4000關得而復失。半日恒指升206點或1.1%，報收18413，但較開市價低逾百點，半日暫收陰燭。國指半日升82點或1.2%，報收6520；科指報收3945，升80點或2%。半日成交額689.58億元，缺乏北水下有呢個成交算唔錯，但重磅股大多高低走，半日收低於開市價，食糊意味甚濃。

重磅科技股全線高開，但大多高開低走，但半日仍保升幅。騰訊(00700)半日升0.7%，報收363.2元，半日高位372.6元，未能突破375-380元阻力。美團(03690)半日僅升0.16%，120元未能企穩，半日報收119.3元。京東(09618)跟網易(09999)半日表現較強，升逾4%，前者盤中一度升逾6%，但未能企穩開市價，後者則報收156.9元，企於開市價之上。阿里(09988)跟百度(09888)半日升逾3%；小米(01810)跟攜程(09961)則升逾2%，小米暫企於18元之上。由小米突破10元展升浪，再到公司進軍電動車行業以嚟，阿Man已多次表示，小米今年一定炒高股價進行批股集資，以應付其電動車業務發展，暫時呢個睇法完全無變，小米今年有望重越20元，並趁高批股。一旦小米能成功透過配股集資，預期可集資以百億元計，對其他電動車企，如蔚來(09866)及小鵬(09868)嚟講，係會構成極大威脅。不過今日汽車股亦走高，只有蔚來半日倒跌1%，表現較差，其他均隨大市上升，只係半日升幅亦隨大市縮水。

金融股普遍上升，友邦保險(01299)升3%，終突破60元大關，但70元唔少散戶嘅家鄉價，暫時仍遙不可及；中國平安(02318)及中國人壽(02628)齊齊升逾2%；港交所(00388)升1.5%；大笨象(00005)冇升跌，70元前行人止步。內銀股以中行(03988)表現較差。逆市跌0.28%；其他建行(00939)升0.7%；工行(01398)跟招行(03968)分別升1.1%及2.1%。

生科藥股明顯跑輸大市，本輪升浪呢批股份已唔見有太大作為，今日大市似有短期見頂之嫌，呢批股份更率先逆市下跌。藥明系逆市調整，藥明康德(02359)跌5.8%；藥明生物(02269)跌5.6%，係暫時表現最差兩隻藍籌；同系藥明合聯(02268)更跌11.1%。再鼎(09688)跌7.9%；康龍化成(03759)跌5.2%；信達生物(01801)挫4.3%；康方生物(09926)跌勢較溫和，亦要跌0.3%。

金價曾跌穿2300美元關，金礦股逆市下跌。紫金(02899)下跌1.2%；招金(01818)跌0.5%；山東黃金(01787)跌0.8%；中國黃金(02099)走低1.5%；SPDR金ETF(02840)則下跌0.4%。

港股連升九個交易日，呢兩日喺北水缺席升勢更急，今早高開低走，雖然未見太大調整，但周末前夕，加上大市超買下，短線調整難免，尤其今早遺下逾百點上升裂口，唔排除短線回補，調整初步支持為18000心理關口，而250日線17800應有支持，否則本輪升浪或告一段落，再進一步調整尋找支持。

麥狄文

(徐狄怡‧證監會持牌人)